*പ്രചാരണത്തിന് നാടാകെ : കൊട്ടാരക്കരയിൽ എൽഡിഎഫ് മുന്നേറ്റം
കൊട്ടാരക്കര
കൊട്ടാരക്കര മണ്ഡലത്തിലെ എൽഡിഎഫ് സ്ഥാനാർത്ഥി കെ.എൻ.ബാലഗോപാലിൻ്റെ വിജയം ഉറപ്പാക്കാൻ നാടാകെ പ്രചാരണ രംഗത്ത്. ജീവിതത്തിൻ്റെ എല്ലാതുറകളിലുമുള്ളവർ എൽഡിഎഫിൻ്റെ പ്രചാരണ പ്രവർത്തനങ്ങൾക്കൊപ്പം ചേർന്നു കഴിഞ്ഞു. ശനിയാഴ്ച സ്ഥാനാർത്ഥിയുടെ നാമനിർദ്ദേശപത്രിക സമർപ്പണ വേളയിലും തുടർന്ന് ഉച്ചയ്ക്കുശേഷം ചേർന്ന നിയോജക മണ്ഡലം കൺവൻഷനിലും പങ്കെടുത്ത ജനസഞ്ചയം എൽഡിഎഫിൻ്റെ പ്രചാരണ പ്രവർത്തനങ്ങളുടെ ആവേശം ഉയർത്തുന്നതായി.
കൊട്ടാരക്കര നഗരത്തിലും ഏഴു പഞ്ചായത്ത് പ്രദേശങ്ങളിലെയും നാട്ടിടങ്ങളിലുമെല്ലാം കെ എൻ ബാലഗോപാലിന് വോട്ട് അഭ്യർത്ഥിച്ചുള്ള ചുവരെഴുത്തുകളും പോസ്റ്ററുകളും നിറഞ്ഞു കഴിഞ്ഞു. ഏതാണ്ടെല്ലാ പ്രദേശങ്ങളിലും സ്ഥാനാർത്ഥിയും നേരിട്ടെത്തി സ്ഥാപനങ്ങളിലും വ്യാപാര - തൊഴിലാളി മേഖലകളിലുമടക്കം വോട്ടഭ്യർത്ഥന നടത്തി. വിശേഷ ദിനങ്ങളുടെ ഭാഗമായി ആരാധനാലയങ്ങളിലും പള്ളികളിലുമടക്കം വിശ്വാസികളെ നേരിൽകണ്ട് ആശംസകൾ അറിയിച്ചു.
മണ്ഡലത്തിലെ ലോക്കൽ കൺവൻഷനുകൾക്കും തുടക്കമായി. കരീപ്ര, കുളക്കട, കോട്ടാത്തല മേഖലകളിൽ ഞായറാഴ്ച കൺവൻഷൻ ചേർന്ന് ഭാവി പരിപാടികൾ ആസൂത്രണം ചെയ്തു. മാവടി, തൃക്കണ്ണമംഗൽ, വെളിയം, ഉമ്മന്നൂർ, എഴുകോൺ ഈസ്റ്റ്, തേവലപ്പുറം, വാളകം, എഴുകോൺ വെസ്റ്റ്, കരീപ്ര നോർത്ത്, നെടുവത്തൂർ, കൊട്ടാരക്കര, മൈലം, ഓടനാവട്ടം എന്നീ മേഖലകളിൽ തിങ്കൾ, ചൊവ്വ, ബുധൻ ദിവസങ്ങളിൽ കൺവൻഷൻ ചേരും. എൽഡിഎഫിൻ്റെ മുതിർന്ന നേതാക്കൾ ഈ കൺവൻഷനുകളിൽ പങ്കെടുക്കും.
പ്രചാരണ പ്രവർത്തനങ്ങൾക്ക് ആവേശം പകരാൻ വിവിധ മേഖലയിലെ തൊഴിലാളികളും രംഗത്തുണ്ട്. ഓട്ടോറിക്ഷ, ആശ, അങ്കണവാടി, ഹരിത കർമ്മസേന, സ്കൂൾ പാചകത്തൊഴിലാളി, ചുമട്ടുത്തൊഴിലാളി, പീടിക തൊഴിലാളി, നിർമ്മാണ തൊഴിലാളി, കശുവണ്ടി തൊഴിലാളി തുടങ്ങിയ തൊഴിൽ മേഖലകളുടെ കൺവൻഷനുകൾ ചേർന്നാണ് പ്രചാരണ പ്രവർത്തനങ്ങൾ ഏറ്റെടുത്തിരിക്കുന്നത്. ചൊവ്വാഴ്ചയ്ക്കുള്ളിൽ ഈ കൺവൻഷനുകളെല്ലാം പൂർത്തിയാകും.
സ്ഥാനാർഥിയുടെ സ്വീകരണ പര്യടനം 28 ന് ആരംഭിക്കും. ആദ്യദിനം മൈലം പഞ്ചായത്തിലാണ് പര്യടനം. 29 ന് നെടുവത്തൂർ, 30 ന് ഉമ്മന്നൂർ, 31ന് വെളിയം, ഏപ്രിൽ ഒന്നിന് കുളക്കട, രണ്ടിന് എഴുകോൺ എന്നീ ഗ്രാമ പഞ്ചായത്തുകളിലും, നാലിന് കൊ ട്ടാരക്കര നഗരസഭ, അഞ്ചിന് കരീപ്ര ഗ്രാമ പഞ്ചായത്തിലുമാണ് സ്വീകരണ പരിപാടി നിശ്ചയിച്ചിട്ടുള്ളത്. മുഖ്യമന്ത്രി പിണറായി വിജയൻ ഉൾപ്പടെയുള്ള എൽ ഡി എഫിൻ്റെ അഖിലേന്ത്യാ, സംസ്ഥാന നേതാക്കളും മണ്ഡത്തിലെ പൊതുയോഗങ്ങളിൽ സംസാരിക്കും.
വാർത്തകൾ നൽകാൻ ഇവിടെ ക്ലിക്ക് ചെയ്യു
>
